PEPILING

Iringing arga kang dadi pratandha

Endahing sangkala minangka pangeling dhiri

Hanetepi dhawuh saking Gusti

Gusti kang murbeng dumadi

Gusti kang paring pepesthen

Sapa wani ngingkari

Bakal rugi ing tembe mburi

Mula taat mring Gusti

Kang paring tentrem jroning ati

Anzar Subagas

Garung, 31 Mei 2014

O... NEGERIKU

Banyu…Banyu…
Obahing sliramu tansah kaya wong mlayu

Mloka-mlaku mung karo guyu

Duwe pemikiran kang kaya watu

Aduh sewu…

Pamarintah saiki wis ora isa ditiru

Isaning padha padu

Ora isa dadi satu

Kaya gegayuhan negriku 

Cesc_AS

SEPINING SEPI

Ing stasiun iki
Stasiun pangimpen dhiri
Sun kekancan marang sepi
Sepine, sepi ana tengahing wengi
Sepi aseping sepi
Tansah gawe sayating ati
Tan mrungu obahing lathi
Tan mrungu obahing dhiri
Amung rasa sepining sepi
Nora sembrana
Nora nyoba-nyoba
Mung aneng stasiun iki
Donya pangimpen tanpa isi
Sun ngranti tekaning pesthi
Saka Gusti kang murbeng dumadi

Cesc_AS

NONTON WAYANG

Tak tung, tung,tung...

Swara sampak wus ngumandang

Nandhakake yen wayange sansaya gayeng

Buta lan punakawan uga metu

Padha kiprahan ngrameake swasana

Ayo padha nonton ca

Ngrameake kesenian tinggalan leluhur

Sing jaman saiki wis lengser

Katindih dening modernisasi

Sumangga kancane dijaki

Ayo kanca rame-rame nonton wayang

Ning cedhak kothak

Apa ning mburi gamelan

Welah dalah butane metu kiprahan

Jingkrak-jingkrak polahe

Bengak-bengok swarane

Plorak-plorok mripate

Gawe giris sasolahe

Dadekake ati seneng lan ayem 

Cesc_AS

SAJRONING RASA

Jawa iku nggoning olah rasa
Jawa iku nggoning olah budaya
Ning njur piye?
Pranyata padha nyingkir
Tan bisa ngluhuri

Ana ngendi rasa rasaning wong saiki?
Rasa rasaning ati aneng ati
Ning aja mung dimangerteni
Uga kudu dilakoni
Wong saiki wus nyingkir saka rasa
Tepa slira marang liyan
Tata krama, unggah-ungguh
Wis padha lali
Apa ora isin?
Apa malah mbanggakake?
Mung isa ngucap
Hemmmm

Cesc_AS

SIMBAH

Sepalihing wengi iku dadosaken gumetering ati
Apa wis wancine ngadhep marang Gusti ?
Aku tansah gumeter, atis, lan wedi
Ningali sliramu ingkang badhe kapundhut dening Gusti
Simbah…
Eling sliramu nrenyuhke ati
Tibaning luh saya gobyos ora bisa kabendhung
Aku mung isa donga marang Gusti
Supados ngapura dosaning simbah
Simbah…
Tresnamu tansah kumanthil ana ing ati
Welingmu bakal kelingan tumerap awak iki
Dadosaken kiyating dhiri

Cesc_AS (Anzar Subagas)

SUGIH BUDAYA

Mega mendung kang teka dadekake petenging kalbu

Luh netes pratandha rasa kang nggegirisi
Iku mau ora kanyana
Aku mung isa meneng
Swara bledeg gumlegar nggegerake donya
Aku ya mung isa sedhakep
Derese banyu udan nutupi dalan-dalan lan padesan
Aku ya mung isa sedhakep lan meneng
Apa ya isa ku mung kaya ngono ?
Jawabku “Ora”
Manungsa iku kudu duwe rasa handarbeni
Sing bisa dadekake kuncaraning bangsa
Bumi nuswantara sing sugih budaya kudu dak jaga
Iku minangka jati dhirining bangsa
Yen ora awake dhewe, ya sapa ?
Apa lila kaanggep para “londo” ?
Mula,
Ayo padha ngleluri lan ngopeni budaya nuswantara
Sing luhur lan utama

Cesc_AS (Anzar Subagas)

JAMAN EDAN

Ngger… ngger…
Esuk dak gawe bengi
Bengi dak gawe esuk
Apa iku bener ?
Apa iku ora kuwalik ?
Donya iki sansaya edan
Kahanan tataning angil
Wong salah dianggep bener
Wong bener dianggep salah
Apa iki pratandha akhir jaman ?
Ngger… ngger…
Elinga omongku iki
Akih wong sing keblinger
Keblinger krana pintere
Aja mung tumindak krana nafsu
Tumindaka krana ati nuranimu

Cesc_AS (Anzar Subagas)

KATRESNANKU

Dhuh nimas wong ayu

Kang dadi pujaningsun
Tresnaku marang sliramu
Dakwiwiti kanthi rasa
Rasa sejatining rasa
Yaiku rasa tresna
Tresnaku marang sliramu
Tan kena dipindhakna
Apadene ambane jagad
Apadene jerone samudra
Tresnaku marang sliramu
Tresna awewujud tresna
Tresna sejatining tresna
Kang ora bisa kalambangna

Cesc_AS

GARUDA KANG NANGIS

Kahanan iki gawe girising ati
Panguasa padha nyidra marang bangsa
Nyidra marang garuda
Nyidra marang bumi nuswantara
Kebo putih aran maesa diapusi
Embel-embel lambang dadi pangarep
Gelar priyayi ora duwe aji
Mung isa gumedhe aneng mburi
Bangsa sing mbudaya
Mulya bagya kanthi raharja
Bangsa sing kilangan budaya
Kaya-kaya kilangan sekabehane
Garuda mung isa nangis
Luh kang mbrebes mili
Merga nyawang kahanan bumi pertiwi
Bumi nuswantara iki

Cesc_AS

PANGELING-ELING

Rembulan kang ngawe-awe

Nandhakake sepalihing wulan kalampahan
Mubeng keser, cemlorong
Endah pangarupane
Ing antarane lintang-lintang
Cemlorot sesandhingan
Aku mung dhewe
Ora ana kanca sesandhingan
Nyawang endahing rembulan
Kang ngedap-edapi
Syukur tetep konjuk marang Gusti kang murbeng dumadi
Donya iki dumadi merga kuwasane Gusti
Mula, syukur iku tetep katur dhateng Gusti
Lumantar ngibadah lan dundum marang liyan

Cesc_AS (Anzar Subagas)

OMONG-OMONG JANJI

Atiku wis sayah
Ndheleng polahe pamarentah
Wegah …
Wegah … wegah …

Omong-omong janji
Janji-janji disulayani
Apa ana bukti?
Ning endi?

Dhelengen kae!
Rakyat-rakyat padha sambat
Saya sayah saya mlarat
Nanging kowe malah keparat

Dhelengen!
Rakyatmu padha nangis
Nyambung urip direwangi ngemis-ngemis
Apa iku sing jenenge wasis?

Cesc_AS (Anzar Subagas)

LAMPU ABANG, KUNING, IJO, LAN BIRU

Iringan lagu hip-hop tansah gawe panasing swasana

Abang, kuning, ijo, lan biru
Gumerlape lampu ana gedung
Enom tuwa ora ana bedane
Pria wanita wis lumrahe
Iku dadi werna-wernini kauripan
Duwe masalah padha mlayu rono
Sejatine apa ya iku panggonan sing pas
Anggene ngrampungke perkara
Apa ya ora tambah masalah?
Haduh….
Gedheg-gedheg anggenku ngerti kahanan saiki
Para muda wis karacun dening gumerlape donya
Ora ngerti barang sing hak lan bathil
Pranyata akeh sing ngaku kaum intelek
Sing padha mlebu ana kono
Keblinger anggene golek ngelmu
Ora ngerti apa kang kalakoni
Werna-werni kauripan kang dadekake ramene donya
Haahh..!!

Cesc_AS (Anzar Subagas)

APA YA SING DIARANI "GAUL" IKU KUDU KAYA MANGKONO?

Ati iki tansah nggegirisi

Ngeti kahanan sing sansaya keblinger anggone nglakoni
Padha ngaku yen dheweke iku “gaul”
Jalaran ngomonge nganggo “elo” lan “gue”
Apa ya sing diarani “gaul” iku kudu kaya mangkono?
Jaman saiki akeh sing padha keblinger
Sembarang apik diomong ala
Ala diomong apik
Basa kang wis becik dadi ashor
Miris, miris . . .
Miris anggonku nyawang kahanan iki
Basa leluhur sing utama kayata dilalekake
Elinga, yen basa leluhur iku bakal kuncara salami nira

Cesc_AS (Anzar Subagas)

SOTO

Soto ayam

Soto sapi
Soto kebo
Soto madura
Soto kudus
Soto bandung
Soto rembang
Sugih budaya kang maneka warni
Iku aja nganti dadekake sesingidan lan adu tembak
Kang dadi gegirising ati
Kabeh iku padha

Sinebut padha iku,
Budaya kang maneka warni iki
Dadi jati dhirining bangsa
Kang dadi semboyan bangsa Indonesia
Yaiku “Bhinneka Tunggal Ika”

Cesc_AS (Anzar Subagas)

SWARA ATI

Sumribiting angin wengi saya atis

Aku tansah kelingan esemu
Nalika iku udan riwis-riwis
Lan wit-witan padha kaelus dening angin
Saya suwe tansaya deres
Apa ta kowe ngrasa
Tak enteni tekamu ing sajroning sepi
Nyawang langit kang gumebyaring lintang
Ngenteni sliramu sing ora bali

Cesc_AS (Anzar Subagas)

LELAKON KAWURI

Wengi iki
Sun kekancan marang sepi
Sepine, sepi ana tengahing wengi
Girising ati, gumetering dhiri
Tan bisa dakselaki

Sepi aseping sepi
Tansah gawe sayating ati
Tan mrungu obahing lathi
Tan mrungu obahing dhiri
Tan mrungu gegojegan rikala wengi
Amung rasa sepining sepi
Yen kelingan lelakon kawuri

Sepi aseping sepi
Sun madhep marang Gusti
Gusti kang maha welas,
Gusti kang maha asih,
Gusti kang murbeng dumadi
Sun dedonga sajroning sepi

Dhuh Gusti,
Eling jaman semono, lelakon kawuri
Lelakon werna-werni tan bisa dakselaki
Cidra marang kuwajiban ingsun
Tan mrungu pitutur utusanipun

Dhuh Gusti,
Mugya paring welas asih marang ingsun
Ngapura dosa-dosa kang kalakon
Paring pepadhang tumuju sateruse

Wengi iki tumuju sateruse
Sun ngranti tekaning pesthi
Pesthi kang dadi pepadhang neng ati
Saka Gusti kang murbeng dumadi
Tan bisa dadekake sasar marang dhiri

Cesc_AS
18-07-2013

LUTUNG WARU

Lutung waru
Obahing badanira tansah nggregetake kalbu
Tumindakmu kang konang awon, tetep wae njaga guyu
Tansah sedhakep lan mangku suku
Lenggah wibawa aneng bangku
Dhuh Gusti,
Sapa kang bisa katiru ?
Pamong Praja wus tan bisa digugu
Tukar padudon kang tansah rebut-rinebut
Mung kanggo memayu hayuning pribadi
Ujare kanggo numpes korupsi
Jebul malah kaya Sengkuni mulang ngaji para santri
Mula aja padha rebut-rinebut kadigdayan
Kang tan bisa gawe bungah marang liyan
Pamong Praja kudu anduweni laku utama
Supaya bisa memayu hayuning bawana
Negara kita, Indonesia makmur lan santosa

Cesc_AS (Anzar Subagas)

Emprit

Prit, prit, prit …

Swara manuk aran emprit
Coklat wulu manis kasawang
Sleret irenge nambah gagah
Cucuk ndumuk manthuk-manthuk
Mabur kumleyang menyang akasa
Ngulandara ngumbara
Ngluru sejatineng ngaurip
Urip sajroning ngaurip
Ngalor ngidul
Si emprit bali ngetan menggok ngulon
Kabecikan kaprayogan
Ngarep-arep bakal tinemu
Prit, emprit
Si emprit bali ngoceh
Kumleyang lenggat-lenggot nigas dalan
Mabur saparan-paran
Tansah dedonga
Oleh ngelmu pagesangan

Cesc_AS (Anzar Subagas)

Gege Mangsa "Pungkasaning Oktober"

Mangsa (ora) kaya mangsa
Pitakonku marang mangsa
Aneng ngendi?,
Mangsa sing sabenere mangsa
Mangsa sing dadi pangayom,
Ngayomi tumraping bebrayan

Pranyata…
Ora kuwawa nggone ngrasa
Nyawang kahanan kang nyulaya
Sajak prelu ning ora ngrumangsa
Apa iki salah mangsa?
nggregel jroning ati
Pungkasaning Oktober,
mangsa (ora) kaya mangsa

Cecs_AS
~ Gg. Kanthil, Banaran, 27 Oktober 2013